कृयामाना नामक गैर-नाफामूलक संस्था पेन्सिलभेनियामा पुननिर्बासित भुटानी शरणार्थी समुदायको सशक्तिकरणको उदेश्य बोकेर अघी बढी रहेको सस्था हो । यो संस्थाले सांस्कृतिक सम्पदालाई जगेर्ना गर्दै, सामाजिक लगाव र मानसिक स्वास्थ्य समस्याहरूलाई सम्बोधन गर्ने उद्देश्य राखेको छ। सामाजिक रूपमा एकीकृत र संवेदनशील तरिकाहरू अपनाएर, यसले जनचेतना जगाउँदै समुदायलाई एकीकृत गर्न प्रयासरत छ।
७ सेप्टेम्बर, २०२४ मा ह्यारिसबर्ग, पेन्सिलभेनियामा “सङ्गालो: रिडिङ फर रिजिलियन्स” नामक कथा वाचन प्रतियोगिता आयोजना हुँदैछ। प्रतियोगिता बिहान ११ बजे सुरु हुनेछ। यो विशेष कार्यक्रमले भुटानी शरणार्थी समुदायलाई मानसिक स्वास्थ्य समस्याहरूबाट निको हुने यात्रामा एक महत्त्वपूर्ण योगदान पुर्याउछ भन्ने आशा गरिएको छ ।
प्रतियोगितामा भाग लिन सबै भुटानी युवाहरू योग्य ठहरिनेछन र भाग लिने प्रतियोगीहरूले नेपाली भाषामा लेखिएका कथाहरू पढ्नुपर्नेछ । यद्यपि पाठकहरू युवाहरू हुनेछन्, कथाहरू सबै उमेर समूहका दर्शकहरूलाई लक्षित गरी तयार गरिएका हुनुपर्नेछ । यी कथाहरू केवल भुटान देखि अमेरिका सम्मको यात्रा मात्र होइन, बरु हाम्रो समुदायका विशेष घटनाहरू, महत्त्वपूर्ण व्यक्तिहरू, जीवनशैली, चाडपर्व, संघर्ष र बलका कथाहरू हुनेछन्। कथाहरू भावनात्मक, जानकारीमूलक, प्रेरणादायक र गहिरो रूपमा छुन सक्ने खालका हुनेछन्। यो प्रतियोगिता कुनै साधारण प्रतिस्पर्धा मात्र होइन, यो समुदायका सदस्यहरूको सामाजिक र मानसिक स्वास्थ्य बलियो हुने प्रक्रियाको एक हिस्सा बन्नेछ भन्ने कुरामा आयोजकले विश्वास लिएको छ ।
प्रतियोगितामा उत्कृष्ट प्रस्तुति दिने प्रतियोगीहरूलाई आकर्षक पुरस्कारहरू प्रदान गरिनेछ। प्रथम पुरस्कार $१०००, दोस्रो पुरस्कार $७०० र तेस्रो पुरस्कार $५०० राखिएको छ।
यस कार्यक्रममा सहभागी हुने निर्णायकहरू र अतिथिहरू लामो समयदेखि भुटानी शरणार्थी समुदायको सेवामा समर्पित व्यक्तित्वहरू हुनेछन्, जसले कार्यक्रमलाई अझ विशेष बनाउनेछ।
हाम्रो लक्ष्य भनेको मानिसहरूलाई मानसिक, भावनात्मक र शारीरिक रूपमा स्वस्थ रहनका लागि समग्र दृष्टिकोणलाई प्रबर्द्दन गरेर फेरि आफ्नो जीवन आफ्नै हातमा लिने क्षमता प्रदान गर्नु हो। हामीले यस्तो भविष्यको कल्पना गरेका छौं जहाँ शरणार्थी समुदायहरू मात्र बाँच्ने होइन, समृद्ध हुन्छन्। सांस्कृतिक विविधता बल र सहनशीलताका लागि एक शक्तिशाली उत्प्रेरक बन्न सक्छ र यस कार्यक्रमले त्यसैलाई प्रवर्धन गर्नेछ।
कथा पढ्न नेपालीमा समस्या छ भने पनि कथा अंग्रेजी अक्षरमा पुनःलेखन गरेर पढ्न सकिनेछ । कथा एक हप्ता अघी नै उपलब्ध गराउनुपर्नेछ ।
सङ्गालो: रिडिङ फर रिजिलियन्स समुदायको निको हुने यात्रा सुरु गर्ने एउटा सांस्कृतिक रूपमा संवेदनशील कार्यक्रम हो। यो हाम्रो समुदायलाई सशक्त बनाउने र सांस्कृतिक सम्पदालाई जगेर्ना गर्ने दिशामा महत्त्वपूर्ण कदम हो।
