नेपाली सूचना प्रविधि उद्यमीहरुले नेपाल सरकार र अन्तराष्ट्रिय निकायहरुले सहयोग गरेमा नेपाल विश्वमै एक ‘प्राविधिक हब’ को रुपमा उदाउन सक्ने बताएका छन्।
‘लन्डन टेक विक २०२४’ मा भाग लिन बेलायत आएका नेपाली सूचना प्रविधि उद्यमीहरुको सम्मानमा नेपाली दूतावासद्वारा आयोजित एक समारोहमा बोल्दै नेपाल एसोसियसन फर सफ्टवेयर एण्ड आइटी सर्भिसेज कम्पनीज (नास आइटी) का अध्यक्ष रिचन श्रेष्ठले नेपालमा वर्षेनी १०,००० आइटी स्नातकहरु उत्पादन भै रहेको बताएका छन् ।
नेपालमा हाल २,००० भन्दा बढी आइटी कम्पनीहरुमा ७० हजार बढी जनशक्ति कार्यरत रहेको र कूल विदेशी मुद्रा आर्जन मध्ये साढे चार प्रतिशत आइटी क्षेत्रबाट प्राप्त भै रहेको र आइटी क्षेत्रबाट हुने निर्यात मध्ये झन्डै ६० प्रतिशत अमेरिकामा निर्यात भै रहेको बताएका छन् । सन् २०३५ सम्ममा आइटीसेवा जन्य निर्यातलाई बढाएर झन्डै २ अर्ब अमेरिकी डलर पुराउन सकिने सम्भावना रहेको छ ।
युकेमा मुख्यालय रहेको आइटी परामर्शदाता कम्पनी जेनेस सोलुशनका संस्थापक तथा मुख्य कार्यकारी अञ्जनी फुयाँलले नेपाली सूचना प्रविधि उद्यमीहरुका सफलताका थुप्रै कथा रहेका तर तिनलाई नेपाल सरकारले उपयुक्त नीति नियम बनाएर सघाउनु पर्ने बताएका छन् । गुगल, माइक्रोसफ्ट, अमेजनजस्ता ठूला प्रविधि कम्पनीहरुले पनि नेपालका शैक्षिक संस्थालाई सघाई रहेको छ भने कतिपय विषय ब्रिटिश विश्व विद्यालय हरुमा पढाइ नहुने कतिपय विषय अहिले नेपालमा पढाइ भैरहेको छ । “नेपाली प्रविधि क्षेत्रको लागि अहिले निकै आशाप्रद समय हो र यो अवसरलाई प्रतिफलमा बदल्न नेपाल सरकार, प्राज्ञिक क्षेत्र तथा सूचना प्रविधि उद्यमीहरुले अरु निकट सहकार्य गर्नु पर्छ,” उनले भने ।
बेलायतका लागि नेपाली राजदूत ज्ञानचन्द्र आचार्यले नेपाललाई सूचना प्रविधिको केन्द्र बनाउन नेपाल सरकारले यो वर्षको बजेटमा थुप्रै घोषणाहरु गरेको स्मरण गराएका थिए । नेपाली प्रविधि कम्पनीहरुलाई बेलायतको स्वास्थ्य, आतिथ्य तथा सरकारी क्षेत्रमा पनि आइटी सम्बद्ध सेवा निर्यात गर्न सक्ने ठूलो सम्भावना रहेको र त्यसमा सघाउन नेपाली दूतावास सँधैब तत्पर रहेको जानकारी दिएका छन् ।
नेपाल सरकारले पनि आउँदो दशकलाई सूचना प्रविधि दशकको रुपमा मनाउने घोषणा गर्नुका साथै आउँदो दस वर्षमा आइटी निर्यातबाट तीस खर्ब रुपिया आम्दानी गर्ने भावी लक्ष्य सार्वजनिक गरेको छ ।
