१८ चैत, प्रदेश २ । प्रदेश २ को मन्त्रिपरिषद् बैठकले हावाहुरीमा ज्यान गुमाउनेका परिवारलाई ३ लाखका दरले राहत दिने निर्णय गरेको छ ।
सोमबार बिहान बसेको मन्त्रिपरषदको आकिस्मक बैठकले ज्यान गुमाउनेका परिवारलाई राहत दिने र घाइतेको निःशुल्क उपचार गर्ने निर्णय गरेको हो । घाइतेको उद्धार उपचारलगायतका काममा कर्मचारी खटाउने निर्णय गरेको हो ।
आन्तरिक मामिला तथा कानुन मन्त्री ज्ञानेन्द्र यादवको नेतृत्वमा ५ सदस्यीय उद्दार तथा राहत व्यवस्थापन समितिको गठन भएको छ । घर भत्केकाको पुनर्वास गर्ने र प्रभावितलाई राहत तथा उद्दार गरी सहयोग गर्न सम्पूर्ण सघसंस्थालाई बैठकले आग्रह पनि गरेको छ ।
यस्तै गृह मन्त्रालयले काठमाण्डौबाट त्रिपाल, लत्ताकपडा र औषधी सहितको टोली बारा पठाएको छ । आज बिहानै त्रिपाल लत्ताकपडा र खानेकुरा सहितका तीनवटा ट्रक र नेपाल प्रहरीका ९ जना स्वास्थ्यकर्मीको टोली काठमाण्डौबाट पठाइएको गृह मन्त्रालयको राष्ट्रिय आपतकालीन कार्यसञ्चालन केन्द्रका उपसचिव वेद खनालले जानकारी दिनुभयो ।
