अमेरिका । भुटानी-अमेरिकी प्रख्यात पत्रकार तथा लेखक सीएम निरौलाले आफ्ना पाठकहरूका लागि खुशीको खबर ल्याएका छन्। हालै आफ्नो फेसबुक पेजमा एक पोस्टमार्फत निरौलाले आफ्नो तेस्रो पुस्तक चिहानबाट चिन्तन चाँडै बजारमा आउने जानकारी दिएका छन्।
पोस्टमा निरौलाले आफ्नो पाठकहरूसँग उत्साह व्यक्त गर्दै लेखेका छन्, “राधिका र म हाम्रो तेस्रो पुस्तक चिहानबाट चिन्तन चाँडै पाठकहरूको हातमा पुग्ने खबर साझा गर्दा धेरै नै उत्साहित छौं! यो यात्रामा तपाईंहरूको माया र समर्थनको लागि हामी गहिरो कृतज्ञ छौं। पुस्तकको अपडेट र विवरणका लागि सधैं जसो हामीसँगै रहनुहोस्। यो पुस्तक तपाईंहरूसँग साझा गर्न पाउँदा हामी निकै उत्साहित छौं!”
पत्रकार र लेखकका रूपमा विभिन्न माध्यमहरूमा योगदान दिँदै आएका निरौलाले आफ्ना गहन विचार र कथाहरूका कारण पाठकमाझ ठूलो चर्चा पाएका छन्। उनको लेखनले भुटानी आप्रवासीका रूपमा अमेरिकामा भोगेका अनुभव र अवलोकनलाई विविध विषयवस्तुमा प्रस्तुत गर्दछ।
चिहानबाट चिन्तन उनको साहित्यिक यात्रामा अर्को महत्वपूर्ण थप हुने विश्वास गरिएको छ। प्रशंसकहरूले पुस्तकको आधिकारिक सार्वजनिक मितिबारे थप जानकारी केही हप्तामा प्राप्त गर्न सक्नेछन्।
साहित्य र पत्रकारितामा निरन्तर योगदान दिँदै आएका निरौलाले आफ्ना नवीन दृष्टिकोण र कथाहरूमार्फत विभिन्न संस्कृति र पुस्ताबीच प्रेरणा र सम्वादको सेतु निर्माण गर्न सफल भएका छन्।
