ताप्लेजुङमा जारी तेश्रो पाथीभरा गोल्डकप फुटबल प्रतियोगीतामा आज न्यू स्टार क्लब झापाले घरेलु टोली कर्णसिंह सोनाम स्पोर्टिङ क्लब ताप्लेजुङको सामना गर्दैछ । खेल दिउँसो २ बजेपछि सदरमुकाम फुङ्लिङ्स्थित भानु जनमाविको खेल मैदानमा हुँदैछ।
कर्णसिंहले फिदिम स्पोर्टिङलाई ३–० गोलले पराजित गरेर झापासँगको भेट पक्का गरेको हो । न्यू स्टारले भने सिधै वाइ पाएर ताप्लेजुङसँग क्वाटरफाइनलमा प्रतिस्पर्धा गर्न लागेको हो । कर्णसिंह र न्यू स्टारबिचको विजेताले एम्ब्रोज क्लब मोरङ र चर्च ब्वाइज क्लब काठमाडौबिचको विजेतासँग सेमिफाइनल खेल खेल्नेछ । चर्च ब्वाइज र एम्ब्रोजबिचको खेल भदौ १३ गते हुँदैछ । चर्च ब्वाइज डिफेन्डिङ च्याम्पियन हो ।
यसअघि आइतबार सम्पन्न प्रतिस्पर्धाबाट रेड स्टार क्लव झापा प्रतियोगिताको क्वार्टरफाइनलमा प्रवेश गरेको छ । रेडहर्स क्लब इलामलाई २–१ गोलअन्तरले पराजित गर्दै झापा क्वार्टरफाइनलमा पुगेको हो ।
१० टोलीको सहभागिता रहेको प्रतियोगिताको विजेताले तीन लाख १ हजार १ सय ११ र उपविजेताले एक लाख ५१ हजार १ सय ११ रुपैयाँ नगद पुरस्कारसहित ट्रफी प्राप्त गर्नेछन् । प्रतियोगिताको फाइनल खेल आगामी भदौ १६ गते हुनेछ ।
